ສະມາຄົມສົ່ງເສີມກະສິກຳແບບຍືນຍົງ ແລະ ອະນຸລັກສິ່ງແວດລ້ອມ (ສສກຍອສ) ແມ່ນສະມາຄົມທີ່ບໍ່ສະແຫວງຫາຜົນກຳໄລ (NPA) ທີ່ເຮັດວຽກຮ່ວມກັບຊຸມຊົນໃນ ສປປ ລາວ. 

ສສກຍອສ ເຊື່ອວ່າ ການພັດທະນາແບບຍືນຍົງ ແມ່ນຂຶ້ນກັບການຄວາມຕ້ອງການພື້ນຖານ ຂອງບຸກຄົນ ແລະ ຊຸມຊົນທີ່ດ້ອຍໂອກາດ ໄດ້ຖືກຕອບສະໜອງໂດຍບໍ່ມີຜົນກະທົບຕໍ່ສິ່ງແວດລ້ອມ.

ສສກຍອສ ສຸມໃສ່ກະສິກຳແບບຍືນຍົງ, ການອະນຸລັກຊີວະນາໆພັນ, ພະລັງງານທົດແທນ, ການອະນຸລັກດິນ ແລະ ນໍ້າ, ແລະ ການປັບຕົວເຂົ້າກັບການປ່ຽນແປງຂອງດິນຟ້າອາກາດ, ອົງກອນຂອງພວກເຮົາເຮັດວຽກຮ່ວມມືກັບຊຸມຊົນທ້ອງຖິ່ນ ເພື່ອແລກປ່ຽນຮຽນຮູ້ ແລະ ເຂົ້າໃຈຄວາມຕ້ອງການຂອງພວກເຂົາ ແລະ ເຮັດໃຫ້ການອອກແບບໂຄງການຕ່າງໆມີຄວາມສອດຄ່ອງ ແລະ ເໝາະສົມ. ສສກຍອສ ຈະເປັນສ່ວນໜື່ງທີ່ສະໜັບສະໜູນ ແລະ ເປັນກະບອກສຽງໃນດ້ານການຜັນຂະຫຍາຍຈັດຕັ້ງປະຕິບັດເນື້ອໃນນະໂຍບາຍຕ່າງໆ ທີ່ສົ່ງເສີມຊີວິດການເປັນຢູ່ ແລະ ການອະນຸລັກສິ່ງແວດລ້ອມແບບຍືນຍົງ, ໂດຍຜ່ານການສ້າງຄວາມເຂັ້ມແຂງໃຫ້ແກ່ຊຸມຊົນໄດ້ເປັນເຈົ້າການຫຼັກຕໍ່ກັບວຽກພັດທະນາຊຸມຊົນຂອງຕົນເອງ. ສສກຍອສ ມີຈຸດປະສົງສ້າງອະນາຄົດທີ່ມີຄວາມທົນທານຕໍ່ການປ່ຽນແປງສະພາບດີນຟ້າອາກາດ ແລະ ສົ່ງເສີມມຄວາມສະເໝີພາບສຳລັບທຸກຄົນໃຫ້ຫຼາຍຂຶ້ນ

1. ຄວາມຍືນຍົງ: ພວກເຮົາຍຶດຖື ແລະ ນຳໃຊ້ແນວຄວາມຄິດໄລຍະຍາວ, ການຄຸ້ມຄອງ ແລະ ຊົມໃຊ້ຊັບພະຍາກອນທໍາມະຊາດຢ່າງມີຄວາມຮັບຜິດຊອບ, ເພື່ອຮັບປະກັນວ່າການປະຕິບັດຂອງພວກເຮົາແມ່ນມີຄວາມຍືນຍົງທາງດ້ານສິ່ງແວດລ້ອມ, ມີຄວາມສະເໝີພາບທາງດ້ານສັງຄົມ, ແລະ ມີຄວາມເປັນໄປໄດ້ທາງດ້ານເສດຖະກິດ.

2. ການສົ່ງເສີມການມີສ່ວນຮ່ວມ: ພວກເຮົາສົ່ງເສີມການມີສ່ວນຮ່ວມ ແລະ ໂອກາດທີ່ສະເໝີພາບສໍາລັບທຸກໆຄົນ, ໂດຍບໍ່ຈຳແນກພື້ນຖານດ້ານເສດຖະກິດ-ສັງຄົມ, ການສຶກສາ, ຫຼື ວັດທະນະທໍາ, ແລະ ເປັນກະບອກສຽງເພື່ອສິດທິຂອງກຸ່ມທີ່ດ້ອຍໂອກາດ.

3. ຄວາມຮັບຜິດຊອບ: ພວກເຮົາຮັບຮູ້ເຖິງຄວາມຮັບຜິດຊອບ ແລະ ພັນທະຂອງພວກເຮົາທີ່ຈະເຮັດວຽກຮ່ວມກັບພາກສ່ວນກ່ຽວຂ້ອງ ເພື່ອປົກປັກຮັກສາສິ່ງແວດລ້ອມ ແລະ ສົ່ງເສີມການພັດທະນາແບບຍືນຍົງ. ພວກເຮົາເປັນເຈົ້າການໃນການເຮັດໜ້າທີ່ ແລະ ການຕັດສິນໃຈຂອງພວກເຮົາ ແລະ ມຸ່ງໝັ້ນທີ່ຈະຫຼຸດຜ່ອນຜົນກະທົບຕໍ່ສິ່ງແວດລ້ອມໃຫ້ໜ້ອຍທີ່ສຸດ.

4. ການນຳພາແບບມີສ່ວນຮ່ວມ: ພວກເຮົາສົ່ງເສີມການສື່ສານແບບເປີດເຜີຍ, ການເຮັດແບບເປັນທີມງານ ແລະ ຄວາມຮັບຜິດຊອບລວມໝູ່ ລະຫວ່າງພະນັກງານ, ຄູ່ຮ່ວມງານ, ແລະ ພາກສ່ວນກ່ຽວຂ້ອງເພື່ອບັນລຸເປົ້າໝາຍຂອງພວກເຮົາ.

ຈຸດປະສົງເປົ້າໝາຍລວມຂອງພວກເຮົາແມ່ນແນໃສ່ການພັດທະນາແບບຍືນຍົງໂດຍການເຮັດວຽກຮ່ວມກັບບັນດາກະຊວງ, ອົງການຈັດຕັ້ງ / ຂະແໜງການທີ່ກ່ຽວຂ້ອງພາກລັດ, ອົງການຈັດຕັ້ງທາງສັງຄົມ, ຄູ່ຮ່ວມພັດທະນາ ແລະ ຊຸມຊົນກຸ່ມເປົ້າໝາຍ ເພື່ອສົ່ງເສີມການອະນຸລັກ ແລະ ການປົກປັກຮັກສາຊັບພະຍາກອນທຳມະຊາດ ແລະ ສີ່ງແວດລ້ອມ ຜ່ານການຈັດຕັ້ງປະຕິບັດກິດຈະກຳໂຄງການສົ່ງເສີມຊີວິດການເປັນຢູ່ແບບຍືນຍົງ.