1. ການອະນຸລັກສິ່ງແວດລ້ອມ (Environmental Conservation)

• ໂຄງການສົ່ງເສີມການປູກປ່າໄມ້ທົດແທນເພື່ອຟື້ນຟູພື້ນທີ່ປ່າໄມ້ທີ່ເສື່ອມໂຊມ, ໂດຍສະເພາະໃນພື້ນທີ່ສູນລວມດ້ານຊີວະນາໆພັນ ແລະ ລຽບຕາມຊາຍຝັ່ງແມ່ນໍ້າ.

• ການໂຄສະນາຄຸ້ມຄອງ ແລະ ກຳຈັດສິ່ງເສດເຫຼືອ ໂດຍການສົ່ງເສີມການແຍກຂີ້ເຫຍື້ອ, ການນຳກັບມາໃຊ້ຄືນໃໝ່, ແລະ ການຫຼຸດຜ່ອນການໃຊ້ພລາສຕິກໃນເຂດຊຸມຊົນຕົວເມືອງ ແລະ ຊົນນະບົດ.

• ການສົ່ງເສີມເຕັກນິກກະສິກຳແບບຍືນຍົງ ເຊັ່ນ: ກະສິກຳອິນຊີ, ການປູກພືດພັນແບບປະສົມປະສານ ແລະ ການປ້ອງກັນສັດຕູພືດ.

• ກິດຈະກຳຟື້ນຟູລະບົບນິເວດ ໂດຍເນັ້ນໃສ່ເຂດພື້ນທີ່ປຽກຊຸ່ມ ລຽບຕາມຊາຍຝັ່ງແມ່ນໍ້າ ແລະ ເຂດພື້ນທີ່ໆໄດ້ຮັບຜົນກະທົບຈາກໂຄງການພັດທະນາ.

2. ຊີວິດການເປັນຢູ່ແບບຍືນຍົງ (Sustainable Livelihoods)

• ການສະໜັບສະໜູນ ແລະ ລິເລີ່ມປະຕິບັດການທ່ອງທ່ຽວແບບນິເວດ (Eco-tourism) ໃນເຂດຊົນນະບົດ, ລວມທັງການຝຶກອົບຮົມຊຸມຊົນທ້ອງຖິ່ນໃຫ້ເປັນຜູ້ແນະນໍາ ແລະ ຊ່າງສີມືແຮງງານຕ່າງໆ.

• ການສະໜອງການຝຶກອົບຮົມວິຊາຊີບ ແລະ ຝຶກທັກສະດ້ານກະສິກຳແບບຍືນຍົງ, ຫັດຖະກຳ, ແລະ ທຸລະກິດຂະໜາດນ້ອຍທີ່ເປັນມິດກັບສິ່ງແວດລ້ອມ.

• ການອຳນວຍຄວາມສະດວກໃນການເຂົ້າເຖິງລະບົບການເງິນຈຸລະພາກ ແລະ ສິນເຊື່ອ ສໍາລັບຊາວກະສິກອນ ແລະ ຜູ້ປະກອບການໃນເຂດຊົນນະບົດ ເພື່ອສ້າງລາຍຮັບຈາກຫຼາຍຊ່ອງທາງ.

• ການຈັດຕັ້ງປະຕິບັດໂຄງການປົກປັກຮັກສາຊັບພະຍາກອນທຳມະຊາດໂດຍອີງໃສ່ຊຸມຊົນເປັນເຈົ້າການຫຼັກເຊັ່ນ: ການຫາປາໃນເຊີງອານຸລັກແບບຍືນຍົງ ແລະ ການເກັບເຄື່ອງປ່າຂອງດົງ.

• ການຈັດກອງປະຊຸມຝຶກອົບຮົມກ່ຽວກັບວຽກສຸຂະພາບ, ການສຶກສາຂັ້ນພື້ນຖານ, ແລະ ຄວາມສະເໝີພາບລະຫວ່າງຍິງ-ຊາຍ ໂດຍເນັ້ນໃສ່ກຸ່ມທີ່ດ້ອຍໂອກາດ, ໂດຍສະເພາະກຸ່ມແມ່ຍິງຊົນເຜົ່າ.

3. ການປັບຕົວເຂົ້າກັບການປ່ຽນແປງຂອງດິນຟ້າອາກາດ (Climate Change Adaptation)

• ການສຳຫຼວດປະເມີນຄວາມສ່ຽງ (vulnerability assessments) ໃນເຂດທີ່ມັກເກີດນໍ້າຖ້ວມ ແລະ ເຂດທີ່ໄດ້ຮັບຜົນກະທົບຈາກໄພແຫ້ງແລ້ງ.

• ການສົ່ງເສີມການປູກພືດພັນທີ່ມີຄວາມທົນທານຕໍ່ສະພາບດິນຟ້າອາກາດ ເຊັ່ນ: ແນວພັນເຂົ້າທີ່ທົນທານຕໍ່ຄວາມແຫ້ງແລ້ງ ແລະ ພືດພັນທີ່ທົນທານຕໍ່ນໍ້າຖ້ວມ.

• ການສະໜັບສະໜູນໂຄງການພະລັງງານທົດແທນ ເຊັ່ນ: ລະບົບພະລັງງານແສງອາທິດໃນເຮືອນ (solar home systems) ໃນບ້ານຫ່າງໄກສອກຫຼີກ.

• ການພັດທະນາລະບົບເຕືອນໄພລ່ວງໜ້າສໍາລັບເຫດການອັກຄິໄພ, ນໍ້າຖ້ວມ, ດິນເຈື່ອນ ແລະ ລົມພາຍຸ.

• ການຈັດຝຶກອົບຮົມໃຫ້ກັບຊຸມຊົນກ່ຽວກັບການກະກຽມຮັບມືໄພພິບັດ, ການເຮັດປະຖົມພະຍາບານເບື້ອງຕົ້ນ, ແລະ ການຕອບໂຕ້ເຫດການສຸກເສີນ, ໂດຍສະເພາະໃນເຂດທີ່ມີຄວາມສ່ຽງສູງ.

4. ການພັດທະນາຊຸມຊົນ (Community Development)

• ການອຳນວຍຄວາມສະດວກໃນການປຸກລະດົມການມີສ່ວນຮ່ວມຂອງຊຸມຊົນຢ່າງຕັ້ງໜ້າຕໍ່ກັບການບໍລິຫານ ແລະ ຄຸ້ມຄອງທ້ອງຖິ່ນ ແລະ ວິທີການ/ຂັ້ນຕອນການວາງແຜນການພັດທະນາ.

• ການສະໜັບສະໜູນໂຄງການມີສ່ວນຮ່ວມທາງສັງຄົມ ສໍາລັບກຸ່ມຊົນເຜົ່າ ແລະ ກຸ່ມທີ່ດ້ອຍໂອກາດ.

• ການປັບປຸງການເຂົ້າເຖິງບໍລິການສັງຄົມພື້ນຖານ ເຊັ່ນ: ນໍ້າສະອາດ, ສຸຂາພິບານ, ສຸຂະພາບ, ແລະ ການສຶກສາຂັ້ນພື້ນຖານໃນເຂດຊົນນະບົດ.

• ການຈັດຕັ້ງໂຄສະນາເຜີຍແຜ່ກ່ຽວກັບສິດທິທາງສັງຄົມ, ຄວາມສະເໝີພາບລະຫວ່າງຍິງ-ຊາຍ, ແລະ ຄວາມສາມັກຄີກົມກຽວທາງສັງຄົມ.

• ການສະໜັບສະໜູນໂຄງການພື້ນຖານໂຄງລ່າງຂະໜາດນ້ອຍທີ່ນໍາພາໂດຍຊຸມຊົນ ເຊັ່ນ: ການສ້າງໂຮງຮຽນ, ສະຖານທີ່ບໍລິການສຸຂະພາບ, ແລະ ສິ່ງອຳນວຍຄວາມສະດວກດ້ານສຸຂາພິບານ.

5.  ການສົ່ງເສີມການຈັດຕັ້ງປະຕິບັດເຜີຍແຜ່ເນື້ອໃນເອກະສານນະໂຍບາຍ/ນິຕິກຳທີ່ກ່ຽວຂ້ອງຂອງລັດຖະບານ (Advocacy and Policy)

• ການດໍາເນີນການຄົ້ນຄວ້າກ່ຽວກັບບັນຫາສິ່ງແວດລ້ອມ ແລະ ສັງຄົມ ເຊັ່ນ: ການທຳລາຍປ່າໄມ້, ສິດທິໃນການນຳໃຊ້ທີ່ດິນ, ແລະ ຜົນກະທົບຂອງການປ່ຽນແປງສະພາບດິນຟ້າອາກາດ.

• ການຮ່ວມມືກັບອົງການຈັດຕັ້ງຂອງລັດຖະບານ ເພື່ອພັດທະນາ ແລະ ຈັດຕັ້ງປະຕິບັດນະໂຍບາຍ ກ່ຽວກັບການນໍາໃຊ້ທີ່ດິນແບບຍືນຍົງ, ການອະນຸລັກປ່າໄມ້, ແລະ ຄວາມທົນທານຕໍ່ກັບການປ່ຽນແປງສະພາບດິນຟ້າອາກາດ. 

• ການຈັດຕັ້ງເວທີປະຊຸມສົນທະນາຮ່ວມກັບຫຼາຍພາກສ່ວນກ່ຽວຂ້ອງຊື່ງວ່າປະກອບມີພາກລັດ, ສັງຄົມພົນລະເຮືອນ, ແລະ ຊຸມຊົນທ້ອງຖິ່ນ ເພື່ອສົ່ງເສີມການສ້າງນະໂຍບາຍແບບມີສ່ວນຮ່ວມ.

• ການສະໜອງຄວາມຊ່ຽວຊານດ້ານວິຊາການ ແລະ ຄໍາແນະນໍານະໂຍບາຍຕ່າງໆທີ່ກ່ຽວຂ້ອງກັບການພັດທະນາແບບຍືນຍົງ, ການປົກປັກຮັກສາຊັບພະຍາກອນທຳມະຊາດ, ແລະ ການມີສ່ວນຮ່ວມທາງສັງຄົມ.

• ການຕິດຕາມ ແລະ ປະເມີນຜົນການຈັດຕັ້ງປະຕິບັດນະໂຍບາຍຕ່າງໆທີ່ກ່ຽວຂ້ອງ ແລະ ການເປັນກະບອກສຽງຕໍ່ກັບຜົນບັງຄັບໃຊ້ ແລະ ຄວາມຮັບຜິດຊອບສູງຂອງແຕ່ລະພາກສ່ວນ.

1. ຊີວິດການເປັນຢູ່ຂອງຊຸມຊົນໄດ້ຮັບການປັບປຸງ ຜ່ານການນຳໃຊ້ຫຼັກການປະຕິບັດແບບຍືນຍົງ ແລະ ກິດຈະກຳສ້າງລາຍຮັບທີ່ຕິດພັນກັບການປົກປັກຮັກສາສິ່ງແວດລ້ອມ.

2. ການເສື່ອມໂຊມຂອງສິ່ງແວດລ້ອມ ແລະ ການຫຼຸດລົງຂອງຊັບພະຍາກອນໄດ້ຖືກຫຼຸດຜ່ອນລົງ ຜ່ານຄວາມພະຍາຍາມໃນການຈັດຕັ້ງປະຕິບັດກິດຈະກຳໂຄງການອານຸລັກທີ່ອີງໃສ່ຊຸມຊົນເປັນເຈົ້າການຫຼັກ.

3. ພາກສ່ວນກຳນົດນະໂຍບາຍ, ແລະ ບັນດາພາກສ່ວນກ່ຽວຂ້ອງມີຄວາມຄວາມເຂົ້າໃຈຫຼາຍຂຶ້ນກ່ຽວກັບການເຊື່ອມໂຍງສາຍພົວພັນລະຫວ່າງ ການດຳລົງຊີວິດການເປັນຢູ່ຂອງປະຊາຊົນບັນດາເຜົ່າ ແລະ ສິ່ງແວດລ້ອມໃນເຂດພື້ນທີ່ຊຸມຊົນທ້ອງຖິ່ນທີ່ອາໄສຢູ່.

4. ຄວາມສາມາດຂອງຊຸມຊົນທ້ອງຖິ່ນໄດ້ຮັບການເສີມສ້າງ ເພື່ອເຂົ້າຮ່ວມກິດຈະກຳໂຄງການລິເລີ່ມການອະນຸລັກ ແລະ ການພັດທະນາແບບຍືນຍົງ ແລະ ຂະບວນການຕັດສິນໃຈ.

5. ການຮ່ວມມື ແລະ ການສ້າງຕັ້ງຄູ່ຮ່ວມງານທີ່ເຂັ້ມແຂງຫຼາຍຂຶ້ນກ່ວາເກົ່າ ລະຫວ່າງພາກສ່ວນກ່ຽວຂ້ອງ ທີ່ມຸ່ງໝັ້ນເພື່ອບັນລຸເປົ້າໝາຍດ້ານຊີວິດການເປັນຢູ່ແບບຍືນຍົງ ແລະ ການອະນຸລັກສິ່ງແວດລ້ອມ.